terça-feira, 28 de dezembro de 2010

Entón as olladas volvéronse distantes



Percibiron a través da visión distorsionada
imaxes dunha guerra
Outra de tantas
Alguén le, observa o rostro dun ditador recorrente
Noutro lado da rúa
a puta vida deulle unha patada no cu
ao pobre derrotado
que fuma a porca cabicha que rescatou do chan
Namentres, as gastadas palabras buscan razóns
para seguir en pé
As feridas da alma vanno matando pouco a pouco
Sente que está morto
Analiza encrucillados
e descobre que hai enigmas que se escapan
do seu control
A brisa acurralada foxe. Foxe dun país que lle nega unha
esperanza
Inmigrante sen papeis é prostituída por un puto traficante
nun club de carretera
Hoxe, outro asasinato de xénero, indixesta o almorzo
A incompetencia impregna as costas de veleno
Cor acibeche
E máis
Pero; os ollos cérranse, non queren ver
Apágase un televisor
e por un instante, experimentas o alivio dos ignorantes


Licença Creative Commons

sábado, 11 de dezembro de 2010

Achanta



a gorxa é longa
As costas do pobre, tumescentes
non posúen folganza
para o espreguizamento
Talvez, “in vino veritas?”
Existe unha bébeda fantasía
contorsionándose na súa mente
as lousas esvaradías perden o equilibrio
baixo os seus pés
Ratas urbanas erguen berros incoherentes
así que, ponte un chapeu amarelo e camiña...
Mañá os colectores volverán a encherse
de lixo


Licença Creative Commons


quinta-feira, 2 de dezembro de 2010

Os espellos proxectan estruturas



que rexeitan inquebrantábeis espíritos
arroutados desconformes
carecen de xeonllos
non morden a terra
e sosteñen pancartas revolucionarias
Argumentos inacabados
crechos pensamentos entréganse
ao sublime acto
de lamber feridas
Soños en salmoira
debuxan unha paisaxe imperfecta
Designios fatalistas inxéctanse
nun océano intravenoso
namentres, o resto dorme a conciencia
recontando moedas
apuntalando o sorriso
no pico dun iceberg metafórico
invento dun repelente traficante